سحر الروايات تكتب: نساء مُلهمة - أسماء فخر الدين في حوار أدبي مع صالون ن
اسمي: أسماء فخرالدين.
كاتبة ومدونة على الإنترنت منذ عام ٢٠٠٤ م.
حاصلة على بكالوريوس تجارة قسم إدارة أعمال.
مواليد مدينة الكويت - ٢٥ ڤبراير العيد القومي للكويت؛ مصرية الجنسية؛ خليط صعيدي على بحراوي محدش يقول حصل إزاي؛ هو النصيب!
عملت من عام ٢٠١١ م حتى ٢٠١٥ م.
-مدير تنفيذي ومديرة برامج شبكة بلدنا الإعلامية راديو وتليفزيون ومجلة على الإنترنت.
-معدة برنامج كلام في الحب مع شاهندة أنور على راديو بلدنا.
-معدة البرنامج الساخر سايكو توك على راديو بلدنا
-معدة برامج تليفزيونية منها برنامج بصمة - وبرنامج بره الصندوق للإعلامية شاهندة أنور على قناة الحدث اليوم.
-عضو مؤسس بفريق القلم الحر للنشر الأدبي الجماعي منذ تأسيسه عام ٢٠١٠ م.
-رئيس فريق القلم الحر من عام ٢٠١٦ م.
وأعمل الآن؛ موظفة حكومية وأم ل ثلاثة أطفال.
-مستشار ثقافي؛ ومسئول النشر بشهرزاد للنشر والتوزيع.
https://www.facebook.com/Shahrazadpub/
وكاتبة وصدر لي:-
•كتب جماعية مع فريق القلم الحر للنشر الأدبي الجماعي.
-كتاب ثورة لايك وكومنت عام ٢٠١٢ م.
-كتاب شبابيك علي شارعنا عام ٢٠١٣ م.
-كتاب أنهار محرمة عام ٢٠١٣ م.
-كتاب فلاش باك عام ٢٠١٤ م.
-كتاب ورق كريمي عام ٢٠١٥ م.
وشاركت بالكتاب الجماعي آيسل عام ٢٠١٧ م عن دار شهرزاد للنشر والتوزيع.
-وصدر لي أعمال فردية :-
•كتاب خواطر الجنية عام ٢٠١٤ م عن دار ليان للنشر والتوزيع
•المجموعة القصصية نصف كيان عام ٢٠١٥ م عن دار شهرزاد للنشر والتوزيع
•العدد الأول من سلسلة حكايات جدى بسبس للأطفال بعنوان القمر عام ٢٠١٧ م عن دار شهرزاد للنشر والتوزيع.
•كتبت في منتدى فتكات بالقسم الأدبي.
•كتبت قصص الأطفال من عام ٢٠٠٩ م تحت إسم خوخة محمود؛ وشاركت بالمجلة الشهرية بالقسم الأدبي وعنوانها نبع الحياة.
•تم نشر بعض من كتاباتي ب مجلة اتحاد المثقفين العرب بالعدد الأول بعنوان ( التغيير)
•تم نشر قصة لحظه فرح بجريدة النهار بتاريخ ١٣ م نوڤمبر ٢٠١٣ م.
•وتحت الطبع مجموعة قصصية بعنوان حكاياتها هي.
وصاحبة مدونة ثرثرة قلم.
https://asmafakhreldien.blogspot.com
https://Twitter.com/asmafakhreldien
https://www.facebook.com/asmaa.fakhr.eldien
•هوايتي: القراءة والمزيكا وكتابة قصص الاطفال.
•شغفي: مساعدة الغير عندي رغبة إن محدش يعاني وبحاول إني أقدم إللي أقدر عليه عشان الشخص يبدأ من مكان ما وصلت ويكمل طريقة ويمكن ده بيسبب لي معاناة لأن مهما كنت مش هقدر أساعد كل الناس.
•حلمي: إن مافيش طفل يعاني؛ عايزة أشوف السعادة في عيون كل الأطفال ويكون عندهم شعور بالحب حقيقي.
ونفسي أتعلم أعزف بيانو بإحتراف ده حلم وتقريبا مش هعرف أحققه دلوقتي بس مين عارف يمكن يحصل.
•أكثر شخصية ملهمة في حياتي: أمي رحمه الله عليها.
•الداعمين لي: أمي وأميرة أختي؛ ربنا يرحمهم وأسرتي.
•قانوني في الحياة: إفعل ما شئت كما تدين تدان
-إتعلمت من:-
•الحياة: إن كل حاجة ولها وقتها؛ وانها رحلة وانا فيها ضيف فاكون خفيف عشان أفارقها مرتاح.
•الدراسة: اني أفهم ماحفظش؛ عشان المعلومات تتحفر جوه الروح؛ وقت ما احتاجها بترجع لي تاني.
•الشغل: التزام وواجب وتأديه المهام؛ وخدمة الناس بحب وشكل محترم؛ هتخلي الكل يعاملك بأحترام.
•الكتابة: مس من الجنون بكون شخص تاني وأنا بكتب بطله كل القصص وأميرة كل الحكايات؛ دنيا تانية غير إللي عايشين فيها نقدر نغير تفاصيل ونعيش عمر تاني فوق عمرنا بسببها.
•القراءة: عالم مختلف؛ وحياة أخرى عرفتني على أبطال وسافرت معاها لعصور كان نفسي أكون فيها وخاصة كتب التاريخ.
•السفر: غربة؛ وفراق وترقب لوصول الغائب يوم لحضن أمه.
•السوشيال ميديا: عالم افتراضي اتعرفت فيه على ناس عندي أقرب من أهلي وأصدقاء أعزاء و لهم مواقف كتير مقدرش انساها.
•حفلات التوقيع: وقت بكون فيه متوترة جدا وشعور بإني تحت الميكروسكوب ولازم كل حاجة تكون بحساب في وقتها مش بكون أنا تقريبا.
•الصداقة: شخص أمين أقدر أحكي كل إللي مضايقني ويسمعني ومايلومش ولا يعاتب ويعايرك في يوم؛ ف لو لاقيت الصديق ده حافظ عليه.
•الزمالة: احترام وتقدير لكل زميل عمل أو زميل مهنة أو دراسة وذكري جميلة للأشخاص لما يعدي الوقت ونتفارق.
•الأهل: كل الدنيا؛ زحمة وتجمعات ولمه ودوشه وهزار وضحك وحياة مافيش زيها.
•الإخوات: سند وضهر حتى لو اختلفنا بنكون عكاز بعض؛ ما تحسش إن ضهرك مكشوف واخواتك معاك دائما بتكون واقف مش خايف.
•الزواج: ميثاق غليظ؛ صك بتمضي عليه وتسلمي حريتك ل شخص تاني ف أختاري صح إللي هتعيشي معاه وتسلمي له الأمور كلها؛ أهم شئ الأختيار .
•الأمومة: أجمل وأصعب شئ في الدنيا؛ بتخليكي تقرري أنك تضحي بحياتك عشان ابنك مش هيفرق معاكي أي حاجة المهم يكون بخير.. احساس صعب فعلا ولحظه صعبه مش عارفة أوصفها لغاية دلوقتي.
•اللقاء: نصيب وميعاد بنروح له بدون تخطيط.
•الفراق: مؤلم وقاتل وبيكسر القلب والروح؛
لكن هو مكتوب ولابد يحصل مهما طال الوقت بأي شكل هيحصل؛ عاشر يا إبن أدم مسيرك مفارق.
•الخصام: لحظات ويدوب ويخلص مع أول نظره للعين تخلي القلوب تصفي وينتهي مع أول كوباية شاي نشربها سوا.
•الحب: رزق من عند ربنا؛ ومالوش سبب ولا هدف ولا عنوان.
•الكره: مرض ولعنه؛ بتصيب القلوب بالعطب.
•المنافسة: سبب للمحاولة والإستمرار والنجاح والمثابرة.
•الدعم: ترياق النجاح؛ بيساعدك تكمل وتعافر وتقف وتكمل خطواتك.
- ١٠ نصائح للمرأة -
•إنت جميلة في كل الأوقات والأحوال؛ محدش يهز ثقتك بنفسك أبدا؛ جمال الروح باق مش بيزول.
•ربنا خلقك حره؛ مش تابع ل أي حد ولا مملوكة ل حد عشان يتعامل معاك بعنف أو إهانة ف كرامتك قبل أي شئ.
•انت كيان كامل مش نصف كيان مش محتاجة حد يكملك؛ فاللي هتكملي معاه حياتك يكون عارف قيمتك كويس.
•انت الأم؛ أساس البيت - الحضن إللي بيساع الدنيا كلها ومكان الأمان لأطفال ف خليهم واثقين أنهم بخير طول ما أنت موجودة وكوني قوية.
•الحياة رحله صعبه كوني في بيتك نسمه الصيف الخفيفة إللي يحبها كل الناس وترتاح في وجودها.
•كل لحظه وليها حالة ف ماتقوليش استحالة
مافيش مستحيل؛ إللي هنقول استحالة نقبله أو نعمله لو شفناه حصل مع حد هييجي اليوم لو حصل معانا ممكن نقبل اللي قلنا استحالة نقبله.
•حببوا أولادكم في العائلة والأصول والقيم والأخلاق ماتفرقيش بين بنت و ولد عشان لما العمر يعدي تلاقي سند تتعكزي عليه ولما يشوفوه الناس بعد فراقك يدعوا لك على تربيتك .
•مش غلط انك تاخدي قرار وتكتشفي انك غلطتي ولكن الغلط انك تكملي الطريق لمجرد إنك وافقتي!
•من باعك بيعيه ولا تبكي عليه؛ في ناس خسارتها مكسب.
•شهادتك وشغلك هي سندك الحقيقي في الحياة.
#أسماء_فخر_الدين
#نادي_المرأة_الملهمة
#ملهمات_العمل_الإبداعي
#Inspirational_Women's_Club
للإنضمام لجروب صالون ن ومتابعة فقرة نساء مُلهمة 👇
تعليقات
إرسال تعليق